១. សូមមើលទង់ជ័យ ឆព្វណ្ណរង្សី
ដែលមានរស្មីភ្លឺស្រស់ល្អ
ខៀវលឿងក្រហម ព្រមទាំងពណ៌ស ហង្សបាទនឹងពណ៌ដ៍ភ្លឺផ្លេកៗ
២. ប្រទេសតូចធំ
បានស្ម័គ្រស្វាគមន៏ ជំនុំគ្នាច្រើនអនេក
ព្រមយករស្មី ព្រះពុទ្ធគួរត្រេក ប្រសើរពន់ពេកក្រៃកន្លង
៣. ធ្វើជាសញ្ញា
ទង់ជ័យសាសនា នៃសម្ពុទ្ធធំចម្បង
ចូរយើងរាល់គ្នា យកចិត្តចាំចង នឹកដល់ព្រះអង្គជាអម្ចាស់
៤. ទោះជាតិផ្សេងគ្នា ក៍ត្រូវដឹងថា សុទ្ធសឹងតែជាពុទ្ធសាសន៍
ត្រូវមានសាមគ្គី ទាំងក្មេងទាំងចាស់ ប្រឹងប្រែងឲ្យណាស់គ្រប់ៗគ្នា
៥. សូមសាសនាពុទ្ធ ថ្កុំថ្កើងខ្ពស់ផុត រុងរឿងវិសុទ្ធថ្លៃថ្លា
ហើយមានជ័យជោគ ផ្សាយពេញលោកាដោយជនជ្រះថ្លាច្រើនសែនលាន
៦. មានចិត្តស្នេហា គោរពបូជា ចំពោះព្រះធម៌ដ៍កល្យាណ
ទាំងមនុស្សទេវតា ស្នេហាគ្រប់ប្រាណ ប្រាថ្នាចង់បានសេចក្តីសុខ។
៧. យើងខេមរជាតិ នាំគ្នាខ្មីឃ្មាត កាន់ធម៌និងបានផុតទុក្ខ
រួបរួមសាមគ្គី ពីនេះទៅមុខ យើងនឹងបានសុខក្សេមក្សាន្តត្រាន។
៨. ព្រមព្រៀងប្រព្រឹត្ត កាន់ធម៌សុចរិត
ឆ្ពោះទៅកាន់ឋាននិព្វាន
ជាទីផុតទុក្ខ បានសុខក្សេមក្សាន្ត ជាតិយើងនឹងបានសោយសុខា។
(បទនិពន្ធរបស់សម្តេចសង្ឃរាជ ជោតញ្ញាណោ ជួន ណាត ព.ស.២៤៩៥ គ.ស.១៩៥០)
No comments:
Post a Comment